Seid faschd 8zisch Johr- Oskar Hardung

Der alde un immer noch neie Familie Gsangsveroin!

Da Sängerbund hod sisch beizeit, noch 97 Johr, 

1947 geöffnet un a die Fraue zum singe eugelade.

1955 in Kinna-Chor 

un ä paa Johr dannoch in Jugendchor gegrind, 

also so, dass die Alde un a die Junge 

bei de Konzerde beisomme soi känne.

Des alles is ma bei dem Konzert om 7. März 

im Lutherhaus in de Sinn kumme,

in de Computer getippt, so den Weg uffs Papier g‘funne.

Des dolle Musical „Don’t Stop The Music“ 

nach Ideen vun da Santina Rudolph un da 

Kerstin Steinhilper un unna da Leidung

vun unsarer großardische Elena,

de Schwet-Singers un dem dolle Jugendchor 

hod in große Erfolg ghabd. 

Isch war, awa näd allä, gonz baff.

Des hod mir also wida ämol gezeigd was da 

Sängerbund fa in doller Familien-Veroin is un des 

immer noch, noch 172 Johr noch da Gründung. 

Leida kenne viel vunn moine Freund un ehemalische 

Sängerinne un Sänger nimmie des mid erlewe, 

die dede sisch a freue. 1947 hod da 1. Vorschdand

da Samse Fritz de revoludzionere Schritt gewagd

un in Frauechor ins Lewe gerufe. 

Heid im „Traditionschor“ mid de Männer vereunt.

Des mache heidzudag viel Vereune, 

awa meischdens blos weil se näd genug Männa hawe. 

Dass 1955 in Kinna (Sängersamen) un korzie Zeid 

schpeda in Jugendchor (heut Elenas Talentschmiede) 

dazu kumme is, hawe ma moim Vorgänger 

dem Imhofs, Karl zu verdonge. 

Zwangsläufisch wollte donn ball druff die 

gonz „Alde“ Sängerbündla a ä Abdeilung gründe, 

awa do hawe die Sängerbündlerinne sisch

gewehrd un sich a glei dazu gsetzt. 

Somit war da Sängerbund-Fän-Seniore-Freundeskreis 

a ins Lewe gerufe. 

Jetzerd war unsa Familie wirglisch komplett. 

Da Veroin wuchs donn a in de 70-80er Johre

uff üwa 800 Mitglieder an, 

was fa in Gsangsveroin vun dere Greß,

im Badische Sängerbund a großi Beachdung gfunne hod.

So schdande zumindeschd bei de Woihnachdskunzerde

bis zu 240 Schdimme uff da gewalldische Bühn,

im Schloß un vorallem in da Nordschdadthall. 

Was awa in besunnara Vadienschd vun de damalische

Chorleiter  un den schdarg ongaschierde Mitglieda war.

Nun awer, was im Lutherhaus von de

„SchwetSingers“ (Konzertchor) zu sehe un zu here wa,

war widda ä Glanzleischdung,

dank da Elena Spitzner, der Vorschdändin Sabine, un

dem gonze Vorschdandsteam, alle Helfa un Rinne,

vom (Traditions’chor) „d’accord“ wa dem gonze Veroin  

sowas meglisch.

Nadierlisch is des alles blos in gläna Abriss vom 

Veroins-geschehe, vun de viele Erfolge in de longe Johr,

awa a vun dem Soziale Engagemet in dem Familienveroin.

Isch wünsch unserem (moim) Sängabund noch viele Johr

Erfolg un freudeschdrahlende Gsischda

uff da Konzert-Bühn.

Danke euch Allen!